WordZero

Karet ’eure ar paotr bihan
Redek ’dreuz d’ar girzhier balan,
Da furchal e-barzh an neizhioù,
Ha gant uioù a bep seurt liv
Lakaat e kerc’henn e Werc’hez
Ur c’harkan ken kaer ha perlez.
Karet ’eure ar paotr bihan
Redek ’dreuz d’ar girzhier balan.

Karet ’eure ar paotr bihan
Monet dre ar pradoù, en hañv,
Dastum bokedoù a-vriad,
Da lakaat ewar* bez e dad ; [?]
O c’hwezh-vat hag e bedennoù
’Save mesk-ha-mesk d'an Neñvoù,
Karet ’eure ar paotr bihan
Monet dre ar pradoù, en hañv.

Karet ’eure ar paotr bihan
Frealziñ e vamm en he foan ;
Pa ve he zrubuilh o reiñ bec’h,
Ha briataat ’rae a-nerzh-brec’h,
Hag ouzh ’n ur dorchañ he daeroù :
- Mamm, me ’zalc’ho dit lec’h a zaou.
Karet ’eure ar paotr bihan
Frealziñ e vamm en he foan.

Karet ’eure ar paotr bihan
Gwelet ar sul o tistroan.
Gant e c’houriz glas, e sae wenn,
’Roe sikour d’an oferenn ;
E ezañsour ’vrañsigelle,
Ken bras war-zu ’n Aotroù Doue !
Karet ’eure ar paotr bihan
Gwelet ar sul o tistroan....

...............

Ab’oe eizh deiz ar paotr bihan
Emañ an derzhienn vras gantañ.
’Vel an dorchenn ’dan ar waskell,
Disec’het buhez ar bugel,
E vamm baour ouzh troad ar gwele
O hirvoudiñ ’leizh hec’h ene.
Ab’oe eizh deiz ar paotr bihan
Emañ an derzhienn vras gantañ.

’Vel ’ya ar c’hoarzh deus ar genoù
’Z eo aet e ene d’an neñvoù.
Eno ezhomm ’bet a uioù
Evit kaout kurunennoù ;
Eno bemdez ’ve ar sulvezh,
Gallout ’ray kanañ hep paouez.
’Vel ’ya ar c’hoarzh deus ar genoù
’Z eo aet e ene d’an neñvoù.