WordZero

Ran-tan-plan, ran-tan-plan - Tud vat,
Adalek ar Roc’h betek Prad,

Eus a-berzh an aotrounez veur,
Disul ’mañ pardon Sant-Treveur ;

C’hoari e pep doare ’vo graet,
Nemet gourenoù ne vo ket,

Er bloaz-mañ ne vo gourenoù,
Se ’lak lazhadeg ’barzh ar vro. -

Evel-se an tabouliner
’Embanne e Roc’h d’ar gwener ;

Hag o vousc’hoarzhin er marc’had,
Ar maeziad a rae serr-lagad.

Ar sul war-lerc’h heol splann ’velkent
Ha tud hag heol e-leizh an hent ;

Dre ar pradoù war ar c’hlazenn
Merc’hed, paotred hag archerien ;

Ha ’c’hoarias dre ar pradoù,
M’hel lavar, nemet gourenoù ;

Ha d’ar jabadao gant ar foultr
’Teuent en-dro evel ar poultr :

Ken ’oa mezv al lammerien,
Ar binioù pe e berc’henn.

Eus a Sant-Treveur daou-ha-daou
’Tistroent gant bleunioù ar gaou :

Bleunioù hañv ouzh o zavañjer
Hag en o c’halon ar gevier ;

Berroc’h ’vit ar bleunioù, paotred,
Pado karantez ar merc’hed.