WordZero

’Benn ur berr amzer pa vin marv,
Ra vin kaset da vered ma bro.

Eizh ’deus soñj eus ma bugalerezh
’Vo dougerien, hep gwall sacherezh :

Rak n’eo pounner ma c’horf disec’het
Nag ul lodenn gaer ’vit ar preñved,

Ma c’horf disec’het, ’vel ur faenn* [favenn]
Er c’hrec’h meinek pell eus an aven.

Ha ’kreiz ar vered me a garfe
’Kichen ar groaz ’ve toullet ma bez ;

Ha war ma c’hroazig anv ebet
Na bleunioù, ur barr ivin ’vroudfet :

’Pad e chomo glas an ivin-se,
Pedit, tudoù, evit ma ene.

Gant na pedo war ma bez gwragez,
’Neus leñvet hini war ma buhez :

Hep goût din m’ vije ouzhin glac’har,
Re geuziek ’vijen dindan ’n douar,

’Benn ur berr amzer me a gousko
’Kichen ar groaz e bered ma bro ;

’Us d’an iliz kozh war ar c’hloc’h krenn
A sko pep mare d’ar gristenien ;

War ar c’hloc’h pa gouezho ar morzhol,
Bombell ma c’halon ne fiñvo taol ;

War-dro hanternoz ma sav ar groz,
’Klevfet youc’hañ war-dro hanternoz :

- Nemet da’m mamm, mallozh war bep gwreg !
Ha war bep merc’h na zo kalonek ! -