WordZero

Ti ma zad ne oa ket pell-wazh
Eus an aod don, ’lec’h ’garfen c’hoazh
Klevet o c’hourdrouz ar mor bras.

Ha ’kichen an aod ar c’hoadoù,
Ed-du ha melchon er parkoù,
War gleuz ar parkoù avaloù.

Du-hont er gorredour uhel
D’abardaez ur c’hloc’hig santel
’Vit an anaon a vrañsell.

D’ar sul goude an ofer’nn-bred,
An dall war bazenn ar vered
’Gane ar werz nevez savet.

Gant Annaig hag he c’hoar all,
War an dosenn ’sellemp gwechall
Bugale ’c’hoari mouchig-dall.

Ha da c’houloù-deiz ouzh ar stêr
’Klevemp o nijal dibreder :
- Per, Per, digor d’an alc’hweder.

Tro-pad ’on bet e ti ma zad,
Ken eürus ’oan hag er c’hoad
Ar voualc’h ’c’hwitelle diwezhad.

C’hoazh ’meus klevet an eostig hañv
O lenvañ bemnoz : me ne ran
Nemet lenvañ ivez bremañ.

Tommoc’h ma gwad : ’meus peoc’h ebet :
Evel en ur vro milliget
’On-me o leskiñ hep sec’hed.

E Gêr-Vras zo trouz an ifern ;
Amañ eo da welet a-vern
Tud nec’het o redek ’vel lern.

Hag ar plac’hed en o selloù
Glaou tan : Sant Erwan ra’m miro !
Kuñvoc’h e sell merc’hed ma bro.

Ar varzhed emaint daou pe dri ;
Evit ar re all n’ouzont-i
Nemet gevier ha lousoni ;

Neuze o sonioù gwast[ad]er
’Kasin ur wech da’m barzhed ker,
Milin, Luzel ha Kervarker.

Gouel an Holl-Sent a zo warc’hoazh,
Ar c’hleier ’zeu en-dro : allaz !
Me ’gav ar c’hleier ’vel ar c’hlaz.