WordZero

O vont en hent, hep tra da frealz ma c’halon,
’Troc’his ur bod ivin e ti an anaon.

Barr ivinenn koantik, c’hwezh vat ec’h eus laosket
’Vel louzoù war c’houli d’ar paourkaezh divroet !

Pa sav ma nec’hamant ’vel avel-kroz war vor,
Bodig an anaon ’zegas koun ouzh Arvor :

N’eo ket an aod du-hont, ha pelloc’h al listri,
Ha ’tro traezh diwar nij o koagat ar brini ?

E-kreiz ar c’hoadoù frank an evned a ziroll,
Dreist kribell ar menez a-raok ma guzh an heol ;

Skiltr eo dre an hent kleuz taol skourjez ar glaouer,
Ha mouezh ar foeter-bro pa gan ken dibreder.

War-dro koan, ouzh ar skol war an dachenn uhel,
Me ’fell din klevet c’hoazh mamm gaezh ouzh ma gervel.

Ar c’hleier a vrañsell : ’vit an ofer’nn-bred eo,
Evit ur vadeziant, pe d’ur c’hañv marteze ;

Kempennet an iliz, ha setu ’tont e-maez
Ur rumm merc’hed e gwenn, ’vel ’deiz gouel ar Werc’hez :

C’hwec’h ’zoug o mignonez d’he bez ’zo war ar roz,
C’hwec’h all ’gan gwerz ’zigor an nor er baradoz…

Bemnoz ’arsav mouezhioù ’zo mouget da viken,
Pa bar ma daoulagad war ar bod ivinenn.