WordZero

Me ’gar dindan skeud ar stered
Heuliañ koumoul en oabl stennet,
Bale d’an eneoù poaniet.

Gwragez ’meus sellet ur vandenn
O vont e du, gouelet o fenn ;
Unanig a semplas a-dreñv ;

D’he c’halon ’tougas he dornig,
’Lec’h ur spernenn a dreuze mik,
Ha bleuñv lili ’beg ar bodig.

Ha klevet ’meus ’vit an noz-se
Ur vouezhig kuñv dre ma huñvre,
Ken truezus din e lâre :

- Mar plijfe deoc’h sevel ma foan,
’Tistrofet war ma bez buan,
’R barr ivin ’vodfet hoc’h-unan…-

Evit he c’havout, Doue ’oar,
’Afen dre ur mor a c’hlac’har
Pe dan ar purgator dispar ;

Me ’oar ivez ’oe miret din
P’emañ en enkrez, betek m’in
D’he diboaniañ war ma daoulin ;

Ha p’am bo savet hec’h anken,
War ar c’hoabr skañv n’hirvoudo ken,
Na biken n’he gwelin, biken…

Ha didruez ’on ’ta, siwazh !
Ma finijenn-me ’ve re wazh : …
Dezhi me ’zougo ’n ivin glas,

P’em galvo Doue ma-unan* ; [T unon]
Ha d’he zro ’treuzo ma c’halon
Gant he spernenn ; ra treuzo don !

Ha war he lerc’h m’ene poaniet,
Hon-daouig ouzh skeud ar stered
Gant ar c’houmoul ’afomp bepred.