WordZero

’Us d’ar vro ’vel ur vogedenn
Ar goañv didruez a dremen.

En oabl hudur heolig Doue
War Dreger ne baro feteiz ;

Ul liñsel wenn war an douar,
Erc’h ha skorn, ha kañv ha glac’har.

Hag an avel war Venez-Bre
Bemnoz a yud ’vel ar preizher,

’Vel evn an Ankoù ’pad an noz
An avel war ar menez kozh.

Neuze ’sav eus an douar pri
An dud varv e-maez o zi :

Pedit, tud vat a Vreizh-Izel,
Emberr pa glevfet an avel.

Ab’oe bloavezh ar vosenn veur,
Ur goañv ken kalet, kenvreudeur :

N’eo ken ar c’hlozard* ’kreiz ar c’hoad, [ar gegig]
Nag an naered o c’hwibanat ;

Ne glever nemet ar mor bras
A lamm hag a c’hrozmol, siwazh !

- ’Kichen an aod d’an hanternoz
Petra, gwregig, ’out o c’hortoz ?

Ma gwaz az ay ouzh sked al loar
Hag e vugale, ’maint pevar ;

Ab’oe an abardaez ’meus doan,
War ar garreg ’youc’h ar morvran.

Klemmus, ’vel ar c’hlaz en draonienn,
Klemmus ar c’homm war-dro - Loaven. -

An deiz war-lerc’h pevar arc’hed
Da gaout ar Porzh-Gwenn ’oant douget,

Douget eus an enezenn-erc’h*, [Loaven]
Ur vaouezh mantret war o lerc’h :

Pa oa an hanternoz o son,
’Oant bet beuzet ’kreiz ar mor don.