WordZero

Ur vro, ’zo bet lâret din-me,
Ur vro zo e tu ar c’hreisteiz,

’Lec’h an dud a zo eürus,
Rak an amzer vat zo padus ;

Ar vro-se ivez ’ribl an dour,
Ar mor-se bepred glas ha flour,

Glasoc’h ’vit brozh en abadenn
Ha flouroc’h c’hoazh evit seizenn ;

Dre an tonn ’n aezhenn ’ra stadig
’Vel d’e ankene* ur floc’hig ; [un drester]

Ha pa c’hwezh an aezhenn glouar,
Drev a rez an houl d’an douar,

’Lec’h er gwez kammed an delioù
Ne weñvezont*, nag ar bleunioù ; [ne weñvont]

Ar bleunioù bepred zo kempenn,
Hag eno ’tiskuizh ar gwenen*. [gwenan]

Ul liorzh dre-holl ’larfen-me,
Avaloù aour, ha glas ar gwez :

En neizh-se an evned zo drant,
Hag ar merc’hed ivez zo koant,

Ken koant, ken koant, Aotroù Doue,
Ken na gredfen sellet oute.

D’o feunteun santel r’hallfen mont,
’Lec’h d’ar pardon holl a zeuont,

Ha neuze ’klevfen ar varzhed
O kano o gwerzioù brudet,

Laouen ’vel ar gwennili ’nij,
Ha muioc’h ar mordrouz na blij :

Ar baradoz ’lârfen eno,
Ma ne vije keit eus ma bro.

- Paotr-karr, war an tu all d’al lenn
Ha ne welan ur verc’hig wenn ? -

Ur verc’h o kannañ ’traoñ an dour,
Gwenn he sae, ha blev melen aour.

- Ha ne glevan ur vouezh ivez
A lâr kanaouenn an aelez ? -

Mouezh ar plac’h yaouank a glevez
A lâr kanaouenn ar Werc’hez ;

Kollet amañ eus a bell bro
D’he bro yen a lâr kenavo,

Hag a c’houl’ pe bremañ mervel
Pe gwelet ur wech Breizh-Izel. –

Deus eta, merc’hig, ’n da vro yen
E bro an derv, tost d’ar Porzh-Gwenn.