WordZero

Pa oa war ar varvskaon, he daoulagad serret,
’Vel ur gantollig koar ’ve warnezhi c’hwezhet,
          Pa oa war ar varvskaon kousket,

Serret he daoulagad, kempennet ha lirzhin,
Da vont d’ar baradoz hec’h ene o c’hoarzhin,
          Serret he daoulagad ouzhin,

Ma vijen daoulinet dirak he c’horf marv
’Lec’h dour ’m bije karget ar piñsin gant daeroù,
          Ma vijen daoulinet eno.

- Pa oe paouezet mik he c’halon da dridañ,
’Vel ur fust ’barzh an eost torret dre nerzh dornañ,
          Morzhol he c’halon da vrallañ,

Lâr din, beleg ar Roc’h, savet an eonenn
D’he muzelloù digor, hag eñ ’lammas war-benn,
          Lâr din, me ’ray he finijenn,

Ma anv pe gant keuz pe gant fae marteze
’N he fedenn ziwezhañ, distaget hec’h ene,
          Ma anv-me gant keuz pe fae.

- Klevet ec’h eus, maouez, ’pad nozvezh ar c’hañvoù,
Huanadiñ ar c’horf paour goude ar pedennoù,
          Klevet ec’h eus e c’houlennoù ;

’Vel ur gourgammig tan neuze an ene kaezh,
Gwelet ec’h eus o klask dre an ti he farez,
          ’Vel ur gourgammig tan, maouez.

- Chomet he-unanig ’barzh an arched en noazh,
Holl dud ar c’hañv pa oant dastumet en hent bras,
          Chomet hec’h-unanig, siwazh !

Ur garlantez spern-gwenn en he gwele ganti,
Kleuzier, ec’h eus koachet dindan pemp troatad pri
          Ur garlantez spern ha lili.

Ha pa serrjout an nor d’an abardaez, kleuzier,
War he bez ur verc’h dreut, treut, pe un aelig kaer,
          Pa serrjout ar vered emberr ?

- Aotroù Doue an neñv, c’hwi hoc’h eus ma c’hrouet,
Ha me zo er bed-mañ ur paourig divroet :
          Ra vezo Doue benniget !

An hentoù daou-ha-daou a zo berroc’h amañ,
Ma farezig kollet ’on ma-unan bremañ
          En hent hiroc’h evit unan ;

Kant bloaz ’n dije bevet hep gouli ’n he c’halon,
Ha me war-benn kant bloaz ma gouli ’vo ken don :
          Hi zo aet gant Doue hepdon.

Ha me, ’vel ur c’hi klañv taolet ’kreiz an aven
Pe ’vel ur bod derv troc’het war an dachenn,
          Perak ’on amañ o tremen ?