WordZero

An heol ’oa o kuzhañ, hag an oabl liv ar gwad
Pe ’vel ur forn tanet gant holl skourroù ur c’hoad,
          An heol ’oa o kuzhañ diw’ad* : [diwezhad]

Ma kuzhfe da viken heol an Aotroù Doue
Ha ma vije hirie ’n diwezhañ abardaez,
          Ma kuzhfe da viken, ha me !

Ha me eus toull ma dor ’soñjen em bro ken pell,
Pa welis o tiskenn digor e ziveskell,
          Eus toull ma dor ’welis uhel

Un er* dreist ar goabrenn, klasket e hent gantañ [erer]
O tiskenn d’an douar seul dostoc’h seul vihan,
          Er pe sparfell pe laouenan ;

Digor e ziveskell evel ar brini-mor,
An evn ’us d’an douar war nij eus toull ma dor
          ’Talc’he e ziveskell digor ;

En e benn melen aour daoulagad ur verc’hig,
E zremm war an tu kleiz hag e sell ken koantig,
          En e benn daoulagad Naig :

Evnig an anaon ne laoskas nep klemmvan
’Pad lâris requiem ’vit an hini ’geuzian,
          Evnig an anaon ne gan.

Requiem æternam : hag eñ d’an nec’h dudi.
- Gortoz, ur bedenn c’hoazh ’garfen da zeraouiñ :
          Requiem æternam ’viti.

Al laouenan war gresk ’dreist ar c’houmoul emberr
War sin ’glask he hent mat ’reas un dro, div pe zeir,
          Al laouenan deut da vout er.

Evnig an anaon bepred ’n ur uhelaat
’Barzh ar c’huzh-heol ’eas kuit dirak ma daoulagad
          Evn an Aotroù Doue moarvat.

Hag ur c’harm ken klemmus, pa gouezhas an noz-se,
N’ouzon pe eus an neñv pe eus kreiz ma ene,
          Ar c’harm ’glevan bemnoz ab’oe.