WordZero

Karout a ran klevet en noz kan ar c’hegi,
Aketus, diankoua, hep aon na diegi,
Sonn a-greiz-holl, diwar an eil klud d’egile,
Pep hini ’laosk e damm galvadenn da vale.
Darn a gan dic’halloud, darn all skiltr pe raouiet,
Lod a zistag sonioù burzhudus da glevet ;
Met holl, bras ha bihan, talvoudek ha dister,
War c’hed atav, daoust d’ar c’housked pe d’ar skuizhder,
Daoust d’an erc’h pe d’ar skorn, d’ar glav pe d’an avel,
Holl e koulz a lakont o mouezhioù da sevel,
Hag holl en ur ganañ ’reont o c’hevridi :
Dougen uhel enor ha brud vat ar yerdi.
A bep oad, a bep gouenn, a bep liv, e veskont
O sonioù da hopal, da c’hervel, da respont ;
Hag an holl sonioù-se, dastumet ’us d’ar Vro
’N ur ganaouenn hepken galloudus ha faro,
Betek meur a skouarn, betek meur a galon
A gas e-kreiz an noz an eñvor hag ar son.

’Vel-se, pa ve koabrenn deñval war Vreizh-Izel,
Morgousket pep kalon, dilavar pep muzell,
Deus du-mañ, deus du-hont e sav mouezhioù sklentin,
Mouezhioù gwazed dihun pell a-raok ar mintin,
Ar re-se gant netra n’oufent bezañ harzet
Da sentiñ penn-da-benn ouzh o dever barzhed.
Daoust ma ren tro-war-dro da Vreizh noz an ankoua,
Daoust ma wask, evel ur vantell plom war o skoaz
Goapadeg, yenijenn, digalonder an dud,
Evel ma sav ur c’han kilhog diwar bep klud,
Kan ar varzhed a strink eus a bep korn ar vro.

Selaouit ! mesk-ha-mesk, kreñv, gwan, kuñv pe c’harv,
Dizingal, disheñvel e tispak o mouezhioù ;
Stok-ha-distok atav dre bark ar mennozhioù,
E-giz ar Gelted kozh war dachenn an argad.
Etreze kemm ar renk, ar gredenn hag ar gwad,
N’eus nemet war ur son ’gement en em glevont :
Hini karantez Breizh eno, ’vat, ne reont
Nemet ur vouezh, ur c’han hag ur galon hepken !
Eno, ’n ur ganaouenn ha na davo biken,
Unanet holl en-dro d’an Delenn zivarvel,
N’int ken netra nemet mibien da Vreizh-Izel.